فرمانده پولیس تخار می‌گوید که پیش از حملۀ هوایی، قاچاق بران موادمخدر و نیروهای مرزی تاجیکستانی باهم در گیر شدند و در این درگیری دو تن از نیروهای تاجیکستان کشته شده اند.
فضل الله مجددی، والی تخار می‌گوید که بخش‌های مرزی ولسوالی درقد این ولایت که با تاجیکیستان همرز است، بامداد روز دوشنبه (۵ سنبله) گواۀ حمله‌های هوایی نیروهای تاجیکستانی بودند.
آقای مجددی می‌افزاید که این حمله‌های هوایی، چند ساعت پس از نبرد میان نیروهای مرزی تاجکیستانی و قاچاقبران مواد مخدر وابسته به گروۀ طالبان انجام شد.
همزمان با این، عبدالرحمان آقتاش، فرمانده پولیس تخار نیز می‌گوید که در درگیرها و نیز حمله‌های نیروهای تاجکیستانی، دو سرباز تاجکیستانی و شش جنگجوی طالب کشته شدند و نه جنگجوی دیگر طالب زخم برداشته اند.
فرمانده پولیس تخار، می‌گوید که این حمله‌ها بدون هماهنگی با آنان انجام شده است، اما سخن‌گوی نیروهای مرزی تاجیکستان و نیز وزارت دفاع روسیه، حملۀ هوایی را بر مرز مشترک افغانستان و تاجکیستان رد می‌کند. سخن‌گوی نیروهای مرزی تاجیکستان، کشته شدن دو سربازش را در درگیری نیز رد می‌کند.
درقد، از ولسوالی‌های نا امن در ماوارای کوکچه است و نیروهای دولتی تنها در مرکز این ولسوالی حاکمیت دارند. در قد با ولسوالی‌های نا امن ینگی قلعه و خواجه بهاوالیدین و نیز با تاجیکستان هم مرز است.
